Այսօր՝ 05.06.2022թ, Մեծամոր քաղաքի մշակույթի տան դահլիճում, հռչակագրի ընդունումով, համայնքի երիտասարդ ակտիվիստների կողմից ստեղծվեց «Մեծամորի երիտասարդական խորհրդարանը»։ Հիմնադիր ժողովում հաստատվեց կանոնադրությունը, քվեարկությամբ ընտրվեցին նախագահը, ղեկավար մարմինը և մշտական հանձնաժողովները։Երիտասարդական խորհրդարանի անդրանիկ նիստին ներկա էին նաև Մեծամոր համայնքի ղեկավար Վահրամ Խաչատրյանը, Մեծամորի համայնքապետարանի և համայնքային կազմակերպությունների ներկայացուցիչներ, ավագանու անդամներ, հյուրեր։
«Մեծամորի երիտասարդական խորհրդարան»-ի ստեղծումը միտված է կենտրոնացնելու Մեծամոր համայնքի գիտակից, մտահոգ, բանիմաց երիտասարդներին մի կառույցի ներքո, ովքեր ապագայում հնարավորություն կունենան ճիշտ ուղղորդելու իրենց ներուժն ու հնարավորությունները ի շահ համայնքի զարգացման։
Երիտասարդները պատրաստակամ են նեցուկ լինել համայնքային և մարզային իշխանություններին, աջակցել հասարակական, սոցիալական, մշակութային միջոցառումների և ծրագրերի իրականացմանը։ Անհրաժեշտության դեպքում սեփական նախաձեռնությամբ կազմակերպել սպորտային, կրթական ու մշակութային միջոցառումներ։