44–օրյա պատերազմում զոհված Վահագն Խաչատրյանի ծննդյան օրը՝ այսօր մարտի 15–ին, «Եռաբլուրում» նրա շիրիմի մոտ հուշաքար բացվեց։
Վահագնն այսօր կդառնար 21 տարեկան։ Նա ծնվել է Տաշքենդում, ապա յոթ տարեկանից տեղափոխվել Հայաստան։ Վահագնը սովորել է Երևանի թիվ 52 դպրոցում, այնուհետև ուսումը շարունակել է ՀԱՊՏՀ քոլեջում, իսկ երրորդ կուրսի ավարտից հետո մեկնել պարտադիր զինվորական ծառայության։ Նա ծառայել է Ջրականում, պատերազմի առաջին օրվանից մասնակցել է թեժ մարտերին, վերջին անգամ հարազատների հետ կապի է դուրս եկել հոկտեմբերի 8-ին։ Վահագնը զոհվել է հոկտեմբերի 10–ին՝ 19 տարեկանում։ Արցախի նախագահի հրամանագրով ժամկետային զինծառայողը պարգեւատրվել է «Մարտական ծառայության» մեդալով։